२०८३ जेठ २३, शनिवार
एआईले सत्य होइन, मन पर्दो जवाफ दिन्छ : वैज्ञानिक बेन्जियो
२३ जेठ बीरगंज -आर्टिफिसियल इन्टेलिजेन्स (एआई) प्रविधिका प्रमुख तीन प्रवर्तकमध्ये एक क्यानाडाली वैज्ञानिक योशुआ बेन्जियोले वर्तमान एआई प्रणालीहरू सत्य बोल्न नभई प्रयोगकर्तालाई खुसी पार्न र मानिसजस्तो व्यवहार देखाउनका लागि मात्र डिजाइन गरिएको गम्भीर टिप्पणी गरेका छन्।
उनका अनुसार, हालको एआई प्रविधिले सत्यताभन्दा पनि प्रयोगकर्ताको अपेक्षा र भावना अनुसार प्रतिक्रिया दिन्छ, जसले दीर्घकालमा समाजमा भ्रम र अन्योल सिर्जना गर्न सक्ने जोखिम बढाएको छ। “एआई प्रयोगकर्ताले सुन्न चाहेको कुरा बताउँछ, न कि वास्तवमा सत्य के हो भन्ने,” बेन्जियोले भने।
यस चिन्ताजनक प्रवृत्तिलाई मध्यनजर गर्दै बेन्जियोले ‘ल-जिरो (Law Zero)’ नामक नयाँ गैर-नाफामुखी संस्था स्थापना गरेका छन्। उक्त संस्थाको प्रमुख उद्देश्य एआई प्रविधिको पारदर्शिता, उत्तरदायित्व र सुरक्षित विकास सुनिश्चित गर्नु हो।
उनले बताएअनुसार, ल-जिरो भविष्यका एआई प्रणालीहरू मानव हितअनुसार विकास गरियोस् भन्ने सुनिश्चित गर्नका लागि नीति निर्माण, अनुसन्धान तथा अन्तर्राष्ट्रिय समन्वयमा सक्रिय भूमिका खेल्नेछ।
बेन्जियोले पछिल्ला वर्षहरूमा एआईका द्रुत विकाससँगै देखिएको नियमनको अभाव, नीतिगत अस्पष्टता, र सामाजिक असरप्रति गहिरो चिन्ता व्यक्त गर्दै आएका छन्। “हामी एआईलाई बेलैमा नियन्त्रण गर्न असफल भयौं भने, यसको प्रभाव मानव समाजका लागि गम्भीर हुनसक्छ,” उनले चेतावनी दिए।
एआई प्रविधिको शक्ति र खतरालाई एकसाथ बुझेका वैज्ञानिक बेन्जियोको यो पहलले विश्वभर एआई नियमनबारेको बहसमा नयाँ तरंग ल्याएको छ।
टोरन्टो, क्यानाडा – एजेन्सी
